PILIMONI 'INA LETA PAULO 'I'ETOLADINA

Pilimoni tauna Yesu 'ana toemisa 'ebweu, ta 'ina 'ali'ei 'ana esana Onesimo 'idena sinena, ga muliyega Paulo ma'iyana sielobaloba sena Loma 'enaya. Paulo Onesimo nina Yesu tetelina 'ie'itena ga 'iemisena. 'Enega Paulo Pilimoni 'ina leta 'i'etoladina be 'aene Onesimo 'itauye be Pilimoni 'isawa, be Onesimo 'ina loegesi 'ida nuwatau, be 'i'au'ewa limai 'ina anuwaya.

Philemon

Lokagutoki

1Kagutoki tasigu Pilimoni, 'oyo Yesu Keliso 'ina toguinuwa 'ebweu nadigega 'abo'agu. Ta 'abo'agu ni'atu deliya sisa'ugu, Yesu Keliso 'ina guinuwa manuna. Ta gete tugai Timoti 'ilemegu be 'imu leta gete 'a'eto'etoladinawa. 2Ta 'ima oboboma maibo'ami 'emiya, 'oyo ta nuudai Apia be tasidai Alikipo, tauna ma'edai taetaetapewa Yesu Keliso 'ina guinuwa manuna, be wate 'ima oboboma toekalesiyao maibo'adi 'imu anuwaya sitapwatapwalolo 'ediya. 3'Ida 'Inapwana Yesu Keliso be Tamadai Yaubada 'idi nuwa'ole'oleyega wada miya gwausowala.

Pilimoni 'ina bubuna bobo'ana

4Ni'atu teteliyo yanonona 'aene 'ida 'Inapwana Yesu ta 'ana toyalao maibo'adi 'uoboboma 'ai'ailidi, ta wate 'uemisedi, 'enega tuta yauna 'igu sidasida 'enaya ma igu lokagutoki Yaubada 'ena manuyo. 6'Enega nuwanuwawagu be 'ida egosigosiyana Keliso 'enega 'ida giewaiwaiyeyo, be 'enega yage yaudi bobo'adi Keliso 'enega siapweapwesama 'uda sinapudi. 7Tasigu, 'imu obobomega toekalesiyao ni'atu 'ulemelemedi ga 'adi lotoona 'igiebobo'anena, ta teteliyo 'imu bubuna bobo'ana manuna 'abo'agu wate yanonona, ga 'enega yagwausowala sinabwana.

Paulo nuwanuwana be Pilimoni 'ida tagwala Onesimo 'enaya

8'Enega nuwanuwagu be obobomega 'ebweu yage 'uda guinuwa. 'Abo'agu Paulo 'imu 'ena'i ta deliya yamiyami Yesu Keliso manuna, 'enega sawesaweguya be Keliso 'ana esanega yaloineyo be yage nina 'uguinuwe, ta tuwa tuga, obobomega yaeonayo. 10'Enega yasideyo natugu Onesimo manuna, tauna 'ima miya deli 'enaya ya'awa natunena 'ina emisa Keliso 'enaya manuna.

11Lowa tai nina Onesimo 'ina paisewa 'emuya nigeya bobo'ana, ta ni'atu 'inuwa'ebuni, ga 'ina paisewa 'eguya bobo'ana, ta wate yamwalatonina 'ina bubuna manuyo ni'atu 'ibobo'ana. 12'Enega Onesimo nina yaetuetune ilenawa ma igu nuwamwau, 13manuna nuwanuwagu 'aene yaegagale be tauna 'ilopa'eluyo be 'ilemegu 'igu miya deli 'ena. 14Ta geya'abo yaegaegagale, manuna 'oyo 'ana toloina. Ta wate nuwanuwagu 'imu tagwala 'eguya obobomega 'uda guinuwe, ta geya'abo 'igu 'i'ima 'enega.

15Nai gete 'alena Onesimo 'ipilisinemu tuta kukupana namo manuna be 'abo tuta nina 'iilawa ma'iyayo wada miya ataya. 16Lowa tauna 'imu toguinuwa, ta gete tugai nigeya 'aene 'ietoguinuwa namo, ta tauna wate tada 'awatasina Yesu Keliso 'enega. 'Abo'agu ni'atu ya'awa tasinena, ta 'oyo 'ilobweneyo be 'u'awa tasina 'ai'aile, manuna tauna 'imu toguinuwa ta tasiyo wate 'ida 'Inapwana 'enega.

17Pilimoni, 'oyo be 'abo'agu ni'atu ta'awatasina, 'enega 'agu oboboma 'emuyega ta 'agu 'au'ewa nadigega wate Onesimo 'uda 'au'ewa lima. 18To'ase nadigega lowa 'ina to'umalina nai 'ina lowaga 'emuya 'usa'u be 'abo'agu yayotuli. 19'Abo'agu Paulo nimaguyega gete ya'eto'etoladi 'aene maibo'ana yayotula egumwali. Ta esi geya'abo 'imu lowaga 'eguya manuna yaonaona, manuna lowa 'abo'agu 'igu guinuwega ga yaluyaluwayo ni'atu 'ibobo'ana. 20Tasigu ye, nuwanuwagu be Keliso 'ana esanega Onesimo 'uda obobome ma imu nuwatau, nate lema sinabwana 'eguya, be 'enega 'agu lotoona 'ida bobo'ana 'ai'aila.

21'Igu nuwanuwa gete ni'atu ya'etoladinawa, ma igu emisa be 'aene 'igu ona nidi 'uda nonodi be 'uda muliyedi, ta wate 'uda giesinabwa.

22'Ebweu yage wate nuwanuwagu, nate 'igu 'ebe'eno 'imu anuwaya 'ugibubu, manuna yanuwayaina 'aene 'imu sidasida Yaubada 'ena 'enega 'iabe tuta gidalina be deliyega sili'amigu be yawawa 'emuya.

23Epapila ma'iyagu Yesu Keliso 'ina guinuwa manuna deliya sisa'uma, ta Epapila nina 'ina oboboma 'emuya. 24Nadigega wate taudi ma'egwao 'apaipaisewa: Maki be Alisitako be Dimasa be Luke, 'idi oboboma wate 'emuya.

'Ida 'Inapwana Yesu Keliso yaluyaluwayo 'ida obobome be 'umiya bobo'ana.

'Abo'agu Paulo.

25